Алматы тұрғындарына жер сілкінгені туралы хабарлама келді

Бүгін Алматы тұрғындарына ұялы телефон арқылы жер сілкінісі туралы ескерту хабарламасы келді. Онда қауіпсіздік үшін ғимараттан шығу жөнінде нұсқау берілген.

Төтенше жағдайлар министрлігінің мәліметінше, жер сілкінісі сағат 12:20 шамасында тіркелген.

«Жер сілкінісінің ошағы Алматыдан шамамен 136 шақырым жерде, Қырғызстан аумағында болған. Магнитудасы – 4,9, тереңдігі – 10 шақырым. Алматы қаласында дүмпу сезілген жоқ», – деп хабарлады ведомство.

Мамандардың айтуынша, мұндай ескертулер Mass Alert жүйесі арқылы автоматты түрде жіберіледі. Жүйе Алматы қаласында жер сілкінісі 5 баллдан асқан жағдайда тұрғындарға қауіп жөнінде хабарлама таратуға бапталған.

Бұл жүйенің мақсаты – жер сілкінісі кезінде тұрғындардың қауіпсіздігін қамтамасыз ету және алдын алу шараларын күшейту.