Алматы тұрғындарына эвакуация туралы хабарлама келді: ТЖМ түсініктеме берді

Алматы тұрғындарына сел жүру қаупіне байланысты эвакуация туралы хабарламалар жіберілгеннен кейін Төтенше жағдайлар министрлігі жағдайға қатысты түсініктеме берді. Ведомствоның мәліметінше, бұл – алдын алу мақсатында таратылған ескерту, қалада жаппай эвакуация жарияланған жоқ.

Синоптиктердің болжамына сәйкес, Іле Алатауының таулы аймақтарында қатты жауын-шашын күтіледі. Соның салдарынан сел жүру қаупі артады. Осыған байланысты Төтенше жағдайлар министрлігі, «Қазселденқорғау» мекемесі және Алматы қалалық төтенше жағдайлар департаменті күшейтілген жұмыс тәртібіне көшкен.

Мамандар қауіпті учаскелерді үздіксіз бақылауда ұстап отыр. Ал Наурызбай ауданында тұрғындарды жедел хабардар ету үшін жергілікті деңгейде құлақтандыру жүйесі іске қосылған.

Министрлік тұрғындарды сабыр сақтауға және тек ресми ақпаратқа сенуге шақырды. Сондай-ақ ауа райы тұрақталғанға дейін Іле Алатауына серуендеуге немесе демалуға бармауға кеңес берді.

Бұдан бөлек, құтқарушылар қатты жаңбыр кезінде өзен арналары мен сел жүруі мүмкін аумақтардан дереу кетуді, өзен жағасына және бөгеттер маңына шатыр тікпеуді, сондай-ақ расталмаған ақпаратты таратпауды ескертті.