Алматы тауларында жоғалып кеткен студенттің денесі табылды

Алматыда тауға серуендеуге шыққан 18 жастағы студент Нұрислам Ақылбектің мәйіті табылды. Бұл туралы қалалық Төтенше жағдайлар департаменті хабарлады.

Оның денесі 12 шілде күні таңғы сағат 07:30 шамасында 3000 метр биіктен табылды. Жігіт 2 шілде күні тауға кеткеннен кейін үйіне оралмаған. Жоғалғаны туралы хабар 6 шілдеде түскен.

Іздеу жұмыстарына 44 құтқарушы, полиция мен шекара қызметінің мамандары, 109 құтқару қызметі, еріктілер, 8 техника, 3 дрон, 4 иісшіл ит және Төтенше жағдайлар министрлігінің тікұшағы жұмылдырылды. Іздеу операциясы «Аюсай» визит-орталығында құрылған жедел штаб арқылы үйлестірілді.

Құтқарушылар қатты жел мен ауа райының қолайсыздығына қарамастан, іздестіру жұмыстарын тоқтатпай жалғастырған. Қазір оқиғаның мән-жайын анықтау үшін тиісті сараптамалар тағайындалды.