Алматы тауларында бұзылатын нысандар белгілі болды

Премьер-министр Олжас Бектенов Алматының тау бөктерінде заңсыз жер телімдерін бөлу, тауларды қырқып коттедждер мен тұрғын үй кешендерін салу фактілері бойынша тексеріс жүргізіліп жатқанын мәлімдеді. Бұл туралы ол Мәжіліс депутаты Бақытжан Базарбектің депутаттық сауалына берген жауабында хабарлады.

Үкімет басшысының айтуынша, 1998–2014 жылдары Алматы қаласының шекарасына қосылған аумақтарда жер телімдерін бұрын Қарасай және Талғар аудандарының әкімдіктері берген. 2021 жылдан бері тау бөктерінде жаңа жер телімдері берілмеген. Қазіргі уақытта Алматы қаласы Жер ресурстарын басқару департаменті заңдылықты тексеріп жатыр.

Алматы қаласының сәулет-құрылыс бақылау басқармасы заң бұзғандарға қатысты әкімшілік шаралар қолданып, айыппұл салу және заңсыз нысандарды сүру туралы сотқа талап арыз жолдау жұмыстарын жүргізуде.

Жеке нысандар бойынша деректер

• «Беверли Хиллс» коттедж қалашығы – барлық рұқсат құжаттарының негізінде пайдалануға берілген (2021–2022 жж.).

• Кольсай ықшамауданы (2428, 2428/1 үйлер) – рұқсат құжаты берілмеген, ал №362 учаскедегі нысанның бір бөлігі ғана пайдалануға берілген.

• ПК «Горный гигант», №554 учаске – жобалық құжаттама жоқ, әкімшілік шаралар қабылданды, сотқа сүру туралы талап арыз берілді.

• ПК «Горный гигант», 20А – тұрғын үй кешенін салуға рұқсат берілген (2021 ж.).

• ЖК «Prime Park» – анықталған заңбұзушылықтар түзетілген.

• ЖК «Монблан» және ЖК «Швейцария» – сот шешімімен сүру туралы үкім шыққан, Алматы қаласы Әділет департаментінің бақылауында.

2025 жылы Алматы Әділет департаментінің өндірісінде тау бөктеріндегі заңсыз құрылыстарға қатысты 35 іс болған. Оның 20-сы орындалып, нысандар толық не ішінара сүрілген. Қазір 15 іс әлі қаралып жатыр.

Мемлекет басшысының тапсырмасына сәйкес, Алматының жоғарғы бөлігінде көпқабатты үйлер мен нүктелік құрылысқа мораторий енгізілген (әлеуметтік инфрақұрылым және туризм нысандарынан басқа). Осыған байланысты қала әкімдігі 2026 жылға дейін Алматының жаңа Бас жоспарын әзірлеп, қоғамдық талқылаудан өткізуді жоспарлап отыр.

Премьер-министр Олжас Бектенов тексеріс нәтижелері кейін қосымша жарияланатынын атап өтті.