Алматы полициясы Джеки Чанның келуіне байланысты қауіпсіздік шараларын күшейтті

Алматы қалалық Полиция департаментінде әлемге әйгілі актер Джеки Чанның келуіне және халықаралық киножобаның түсірілім процесіне байланысты қоғамдық қауіпсіздікті қамтамасыз ету мәселесі талқыланды. Бұл туралы ҚР Ішкі істер министрлігінің баспасөз қызметі хабарлады.

Арнайы кеңес барысында құқық қорғау органдарының басшылары мен жауапты бөлімше өкілдері түсірілім алаңдарындағы тәртіпті сақтау, жол қозғалысын ұйымдастыру және қатысушыларды сүйемелдеу мәселелерін пысықтады.

Алматы қалалық Полиция департаментінің бастығы Айдын Қабдулдинов халықаралық деңгейдегі киножобаның Қазақстан үшін маңызы зор екенін атап өтті:

«Біздің міндетіміз – қоғамдық қауіпсіздіктің жоғары деңгейін қамтамасыз ету, тәртіпті сақтау және түсірілім процесінің кедергісіз өтуіне қажетті жағдай жасау. Мұндай ірі жобалар Қазақстанның халықаралық беделін нығайтады, сондықтан әрбір қызмет саласы заң шеңберінде үйлесімді әрі кәсіби жұмыс істеуі тиіс», – деді А. Қабдулдинов.

Фото:ҚР Ішкі істер министрлігінің баспасөз қызметі

Кеңес нәтижесінде төмендегідей міндеттер айқындалды:

 Түсірілім алаңдарындағы қауіпсіздік деңгейін арттыру.

 Жобаға қатысушылардың қауіпсіз қозғалысын сүйемелдеу.

 Жол қозғалысын тиімді үйлестіру.

 Төтенше жағдайлар туындаған жағдайда жедел әрекет ету алгоритмдерін дайындау.

 Жергілікті атқарушы органдармен және ұйымдастырушылармен тығыз байланыс орнату.

Қазіргі таңда полиция бөлімшелері алдын ала жоспарланған ұйымдастырушылық және профилактикалық шараларды іске асыруда. Қала аумағындағы қоғамдық қауіпсіздік штаттық режимде бақылауға алынған.