Алматы полицейлері алаяқтардың жаңа психологиялық айла-тәсілдері туралы ескертеді

Алматы қаласында 1414 нөмірінен келетін SMS хабарламаларды пайдалану арқылы жасалатын алаяқтық деректері жиілеп кетті. Бұл туралы қалалық Полиция департаменті хабарлайды.

Тәртіп сақшыларының мәліметінше, қаскөйлер азаматтарға психологиялық қысым көрсетудің түрлі әдістерін қолдануда. Олар өздерін банк, пошта, салық немесе құқық қорғау органдарының қызметкері ретінде таныстырып, тұрғындарды күмәнді сілтемелерге өтуге немесе арнайы қосымшалар орнатуға көндіреді.

«Алаяқтар "сіздің деректеріңіз ұрланды" деп сендіріп, ақша аударуды немесе несие рәсімдеуді талап етеді. Бұл - негізсіз психологиялық айла. 1414 нөмірінен келген код несие алуға мүмкіндік бермейді, өйткені банктердің өз қорғаныс жүйелері бар», - деп атап өтті Алматы қалалық ПД Киберқылмысқа қарсы іс-қимыл басқармасының бастығы Әнес Қалдыбаев.

Алаяқтардың жиі қолданатын схемалары:

• Қарт адамдарды нысанаға алу: Оларды депозиттегі ақшасын алып, «сақтандыру шотына» салуға немесе мүлкін кепілге қоюға үгіттейді.
• Интернет-сауда және инвестиция: Тауарды төмен бағамен ұсынып немесе жоғары табыс уәде етіп, алдын ала төлем алған соң жоғалып кетеді.
• «Жақыныңыз жол апатына түсті»: Туыстары туралы жалған ақпарат беріп, эмоционалды қысым арқылы ақша бопсалайды.

Полиция өкілінің айтуынша, қылмыскерлер қаражатты көбіне курьерлер немесе мессенджерлер арқылы иемденеді.

Мамандар ең басты ережені еске салады: қоңырау шалушы өзін банк немесе полиция қызметкері ретінде таныстырса да, ешқашан дербес деректеріңізді, карта реквизиттерін және кодтарды хабарламаңыз. Кез келген ақпаратты өз бетіңізше тексеріп, психологиялық манипуляцияларға бой алдырмау маңызды.