Алматы облысында жер сілкінісі сезілді

Алматы облысының сегіз ауылында 2–3 баллдық жер сілкінісі сезілді. Бұл туралы Төтенше жағдайлар министрлігі хабарлады.

Сейсмикалық станциялар желісі жер асты дүмпулерін 19 ақпан күні сағат 14:09-да тіркеген. Жер сілкінісінің ошағы Алматы қаласынан оңтүстік-шығысқа қарай 311 шақырым жерде, Қырғызстан мен Қытай шекарасында орналасқан. Магнитудасы – 5,3, тереңдігі – 15 шақырым.

Есептік қарқындылығы бойынша:
Нарынқол және Кеген ауылдарында – 3 балл,
Саты, Көкпек, Шелек, Қайыпова, Маловодное және Түрген ауылдарында – 2 балл болды.

Сонымен қатар Жетісу облысындағы Жаркент қаласында да 2 баллдық дүмпу сезілген.

Екі күн бұрын Алматы қаласының тұрғындары 2–3 баллдық жер сілкінісін сезген еді. Сол кезде Алматы облысының бірқатар елді мекенінде дүмпу қарқындылығы 2–4 балл аралығында тіркелген.