Алматы облысында үндістандық студенттер көз жұмды

Алматы облысында тіркелген жол-көлік оқиғасы салдарынан үндістандық студенттер қаза тапты. Бұл ақпаратты Үндістанның Қазақстандағы елшілігі растады.

Жол апаты 6 қаңтар күні Алматы – Бішкек бағытындағы тас жолдың 86-шақырымында болған. Оқиға кезінде көлікте Үндістанның бес азаматы отырған. Олардың төртеуі – Оңтүстік Қазақстан медицина университетінде білім алып жүрген студенттер, ал біреуі турист болған. Олар Шымкенттен Алматыға қарай жол тартқан.

Елшіліктің мәліметінше, апат салдарынан екі адам оқиға орнында мерт болған. Тағы үш азамат ауыр жарақат алып, қазір реанимация бөлімінде ем қабылдап жатыр.

«Қаза тапқандардың жақындарына қайғырып көңіл айтамыз және жарақат алған азаматтардың тез сауығып кетуін тілейміз», – делінген елшілік таратқан хабарламада.

Алматы облыстық полиция департаменті жол-көлік оқиғасына қатысты қылмыстық іс қозғалғанын хабарлады. Алдын ала мәлімет бойынша, 33 жастағы Toyota Alphard көлігінің жүргізушісі басқаруды жоғалтып, көлік аударылып кеткен. Жүргізуші сол жерде көз жұмған. Кейін ауруханада Үндістанның тағы екі азаматы қайтыс болғаны белгілі болды.

Қазір апаттың себептері мен өзге де мән-жайлары тергеліп жатыр.