Алматы облысында тіс емханалары көрсетілмеген ем үшін мемлекеттен қаражат иемденген

Алматы облысында жеке стоматологиялық клиникалардың директоры мемлекетке көрсетілмеген медициналық қызмет үшін шот ұсынып келген. Қаржылық мониторинг агенттігінің департаменті аталған іс бойынша тергеуді аяқтады.

Тергеу мәліметінше, клиникалар Міндетті әлеуметтік медициналық сақтандыру қоры арқылы азаматтарға тегін стоматологиялық көмек көрсету үшін 450 млн теңгеден астам сомаға келісімшарт жасаған. Алайда іс жүзінде ем жүргізілмей, медициналық «DamuMed» жүйесіне ортодонтиялық ем жүргізілгені туралы жалған мәліметтер енгізілген.

Күдікті жалған жазбаларды енгізу үшін дәрігерлердің есептік жазбаларын олардың рұқсатынсыз пайдаланған. Сондай-ақ бұрын клиникаларға қаралған балалардың жеке деректері қолданылған.

– Нәтижесінде ортодонтиялық көмек көрсетілгені туралы 4 597 расталмаған жағдай анықталды, – деп хабарлады Қаржылық мониторинг агенттігі.

Сот күдіктінің банктік шоттарына 23 млн теңге көлемінде, сондай-ақ 29 млн теңгеге бағаланған стоматологиялық жабдықтарға тыйым салды. Күдікті келтірілген шығынның 11 млн теңгесін өтеген. Қазір ол үйқамақта отыр.