Алматы облысында сушиден 19 адам уланды: тамақтану орнында санитарлық тексеріс басталды

Алматы облысының Боралдай кентінде 19 азамат тамақтан улану белгілерімен ауруханаға жатқызылды. Зардап шеккендердің барлығы «Алатау» базарында орналасқан «Sushi Time» дәмханасынан тамақ алғандығы анықталды.

Бұл туралы Санитарлық-эпидемиологиялық бақылау комитеті мәлімдеді. Оқиғадан кейін тиісті қызмет мамандары, денсаулық сақтау басқармасы және жергілікті әкімдік өкілдері шұғыл тексеру жұмыстарын бастады. Қазіргі таңда суши-бардың қызметі мән-жай толық анықталғанға дейін уақытша тоқтатылды.

Іле аудандық санитарлық-эпидемиологиялық бақылау басқармасы объектіде тексеріс жүргізіп жатыр. Мамандар тамақ өнімдерінен сынамалар алып, тиісті зертханалық сараптамаға жіберді. Уланудың нақты себептері зертханалық талдау нәтижелері дайын болғаннан кейін белгілі болады.

Жауапты мекеме өкілдері жаз мезгілінде тамақтану орындарын таңдауда аса сақ болуға шақырады. Азаматтарға қоғамдық тамақтану орындарының санитарлық жағдайына және өнімдерді сақтау шарттарының сақталуына назар аудару ұсынылады.

«Құсу, іш өту немесе дене қызуының көтерілуі сияқты симптомдар байқалған жағдайда, өз бетіңізше емделмеңіз. Дер кезінде медициналық көмекке жүгіну қажет», – деп ескертті мамандар.