Алматы мен Токио арасында тікелей әуе рейсі ашылады

2026 жылдың наурыз айында Air Astana әуе компаниясы Алматы – Токио бағытындағы жаңа тікелей рейсті іске қосады. Осы бағыттың ашылуына дайындық аясында Жапонияның жетекші туроператорлары Алматыға келіп, қазақстандық туризм саласының өкілдерімен кездесті.

Іс-шараны «Kazakh Tourism» ұлттық компаниясы, Air Astana және Алматы қаласының Туризм басқармасы ұйымдастырды. Кездесудің басты мақсаты – Қазақстан мен Жапония арасындағы туристік және іскерлік ынтымақтастықты нығайту.

Кездесуге Токионың мәдени, табиғи, премиум және MICE туризмі бағытында жұмыс істейтін 10 ірі туроператоры қатысты. B2B форматындағы келіссөздер барысында тараптар бірлескен туристік бағдарламаларды дамыту, жаңа бағыттарды қалыптастыру және Алматыны жапон саяхатшылары үшін тартымды жаңа орталыққа айналдыру жолдарын талқылады.

Жапон делегациясы Алматының табиғи сұлулығы мен мәдени мұрасына ерекше қызығушылық танытты. Қонақтар Тянь-Шань тауларының, Шымбұлақ тау-шаңғы курортының, Шарын шатқалының көркін жоғары бағалап, жергілікті гастрономиялық бағыттармен де танысты.

Мамандардың болжамынша, жаңа рейс іске қосылған алғашқы жылы Жапониядан Қазақстанға 5–7 мың турист келуі мүмкін.

"Жапония – Қазақстан үшін стратегиялық маңызды нарық. Бұл сапар мен жаңа рейс екі ел арасындағы өзара ынтымақтастықты және мәдени қызығушылықты жаңа деңгейге көтереді", – деді Алматы қаласы Туризм басқармасының өкілдері.