Алматы мен Астанада автотұрақтар қалай жұмыс істейді – премьер-министр түсіндірді

Премьер-министр Олжас Бектенов Алматы мен Астанадағы автотұрақтарды ұйымдастыру мәселесіне қатысты депутаттардың сұрағына жауап берді.

Оның айтуынша, қалалардағы көшелер мен жолдар жергілікті әкімдіктердің қарауында. Сондықтан автотұрақтарды жоспарлау, қай жерде ақылы немесе тегін болатынын анықтау – әкімдіктердің міндеті.

Астанада тұрғын үйлердің маңында тұратын адамдар үшін арнайы резиденттік абонемент бар. Бұл абонемент арқылы тұрғындар өз үйлерінің жанында көлігін тәулік бойы тегін қоя алады.

Ал Алматыда ақылы автотұрақтар тек көшелер бойында, жолға жақын арнайы жерлерде ғана орналасады. Аулаларда, тұрғын үйлердің ішкі аумағында және ортақ пайдаланылатын жерлерде ақылы автотұрақ ашуға тыйым салынған.

Премьер-министр Алматыда жаңа ережелер дайындалып жатқанын айтты. Соған сәйкес, тұрғындарға арналған абонемент енгізіледі:

– 12 айға – 72 мың теңге

– 6 айға – 36 мың теңге

– 3 айға – 18 мың теңге

Зейнеткерлер бұл абонементтерді жарты бағамен ала алады. Абонемент бір ғана көлікке беріледі және айыппұл қарызы болмауы керек.

Әр адамға үйі мен жұмысы маңынан екі автотұрақ орнын арзан бағамен беру ұсынысына үкімет басшысы сақтықпен қарау керегін айтты. Оның сөзінше, бұл жолдардағы көлік санын көбейтіп, бос орын тапшылығына және кептелістерге әкелуі мүмкін.

Сонымен қатар автотұрақ үшін төлем көбіне цифрлық жолмен жасалып жатыр. Қазір адамдар SMS, QR-код, банк қосымшалары арқылы төлейді. Банктік шоты жоқ азаматтар үшін ұялы телефон балансы арқылы төлеу мүмкіндігі де қарастырылып жатыр.

Астанада автотұрақтарды бақылау үшін 36 мыңнан астам камера қолданылады. Алматыда 1600-ден аса «Сергек» жүйесі жұмыс істейді.

Премьер-министрдің айтуынша, автотұрақ мәселесі үкімет пен екі қаланың әкімдіктерінің тұрақты бақылауында.