Алматы әуежайында ер адам өзіне от қойды: оқиғаға қатысты жаңа деректер белгілі болды

Алматы әуежайында 25 тамыз күні орын алған оқиғаға қатысты жаңа деректер белгілі болды. Әуежай терминалында өзіне от қойған ер адамның әрекетіне тұрмыстық жанжал себеп болған.

"Ер адам өзінің азаматтық жұбайымен жанжалдасқан. Ол біздің компанияның тұтынушысы емес. Әуежайдағы кеңсемізге кездейсоқ кіріп, телефон сұрады. Ештеңеден күдіктенбеген агентіміз оған телефон берген", – делінген "НурАй & Ко" авиатурагенттігінің ресми хабарламасында.

Компания өкілі Айсұлу Дутбаеваның айтуынша, агент ер адамның үстінен жанармайдың иісін сезіп, бірден кеңседен шығып кеткен.

"Ол біздің қызметкерді еш бөгетсіз шығарып жіберді", – деді ол.

Оның айтуынша, ер адам өзіне от қойғанға дейін оны құқық қорғау органдары бақылап жүрген.

Қазір ол №4 қалалық клиникалық аурухананың жансақтау бөлімінде жатыр. Дәрігерлер науқастың жағдайын өте ауыр деп бағалап отыр.