Алматы әкімі дұрыс жұмыс істемеген мердігерлер лицензиясынан айырылатынын ескертті

Алматы әкімі Дархан Сатыбалды қаладағы құрылыс және жөндеу жұмыстарымен айналысатын мердігер компаниялардың басшыларымен кеңес өткізіп, олардың жұмысын қатаң сынға алды. Бұл туралы әкімнің коммуникациялар және БАҚ мәселелері жөніндегі кеңесшісі Ильзат Акчурин хабарлады.

Әкімнің айтуынша, ондаған миллиард теңге бюджет қаржысын алған мердігерлер белгіленген мерзімді сақтамай, құрылыс кезінде технологиялық талаптарды бұзып, жұмысты сапасыз атқарып отыр. Кейбір учаскелерде жолдар қазылған соң қайта қалпына келтірілмей, тұрғындар шағынып жатыр.

«Біз үнемі бір жағдайға куә болып отырмыз: құжатта көрсетілген 15 техника мен ондаған жұмысшы орнына алаңда бір-екі көлік пен бірнеше адам ғана жүреді. Жолдың опырылып түсуі, шаң-тозаң, лай-батпақ пен қалыпқа келтірілмеген аумақтар – осының бәрі жауапсыздықтың көрінісі. Бұл – жұмыс емес, бұл – немқұрайлылық», – деді әкім.

Дархан Сатыбалды мердігерлерге қатаң ескерту жасады.

«Жағдайды сыртқы факторларға жабуға болмайды. Жұмысты сапалы әрі уақытында орындамасаңыздар, Алматы жобаларында сіздерге орын жоқ. Немқұрайлық анықталса, лицензиядан айырып, кінәлілерді жауапқа тартамыз», – деп мәлімдеді ол.

Айта кетейік, бұған дейін Алматыда жол жабынының опырылуына байланысты бірқатар мердігер компания әкімшілік жауапкершілікке тартылғаны хабарланған еді.