Алматы әкімі Әл-Фараби даңғылындағы жол апатынан кейін жол қауіпсіздігін күшейтуді тапсырды

Алматы қаласының әкімі Дархан Сатыбалды жол қауіпсіздігі мәселесіне арналған аппараттық кеңес өткізіп, бірқатар нақты тапсырма берді, деп хабарлады әкімдік баспасөз қызметі.

Кеңес барысында әкім 21 наурызда Әл-Фараби даңғылында болған жол апатында қаза тапқандардың жақындарына көңіл айтып, бұл оқиға қалада жол қауіпсіздігін жүйелі түрде күшейту қажет екенін көрсеткенін айтты. Оның сөзінше, полиция бақылауды күшейтіп, жол қозғалысы ережесін бұзғандарға қатаң шара қолдануы тиіс.

«Жолдағы қауіпсіздік – біздің басты басымдығымыз. Егер ережелер сақталмаса, тәртіп болмайды. Полиция барлық құқықбұзушылыққа, тіпті дұрыс тұрақтамау жағдайларына дейін қатаң әрекет етуі қажет», – деді Дархан Сатыбалды.

Қалалық полиция департаментінің мәліметінше, жол-көлік оқиғаларының негізгі себептері – жол қозғалысы ережелерін жүйелі бұзу. Қала көшелерінде күн сайын 270 патрульдік экипаж жұмыс істейді. Сондай-ақ 1641 «Сергек» кешені орнатылған.

Кеңесте жол инфрақұрылымын дамыту мәселесі де қаралды. 2026 жылы 360 көшеде, жалпы ұзындығы 290 шақырымнан асатын жолға орташа жөндеу жүргізу жоспарланған. Оның ішінде 17 негізгі магистраль жаз мезгілінде жаңартылмақ.

Әкім мердігер ұйымдардың жұмысына сын айтып, сапасыз жұмыс істеген компаниялар алдағы жобаларға қатыстырылмайтынын ескертті. Сондай-ақ жөндеу кезінде көшелер тұрғындарға қолайсыздық тудырмауы тиіс екенін атап өтті. Сатыбалды жұмыс барысын өзі аралап, жеке бақылайтынын жеткізді.