Алматы әкімдігі «Барахолка» аумағындағы заңсыз сауда нысанын жою жұмыстарын аяқтады

Алматы қаласы Жетісу ауданында «Заң мен тәртіп» қағидатын іске асыру шеңберінде бұған дейін заңсыз жұмыс істеп келген «Рахат» базарының аумағын босату және абаттандыру жұмыстары басталды. Бұл шаралар қала тұрғындары мен қонақтары үшін жайлы әрі қауіпсіз қалалық ортаны қалыптастыруға бағытталған.

Анықталғандай, «Барахолка» сауда аймағында орналасқан «Рахат» базарын 2018 жылдан бері «ТКМ» ЖШС қолданыстағы рұқсат құжаттарынсыз, жер және кәсіпкерлік заңнамасының талаптарын бұза отырып пайдаланып келген. Осыған байланысты, заңды күшіне енген сот шешімдерін орындау мақсатында, 2026 жылдың 6 сәуірінен бастап Жетісу ауданы әкімінің аппараты аумақты заңсыз нысандардан босату бойынша кешенді іс-шараларды жүргізді. Түсіндіру жұмыстарының нәтижесінде 150-ден астам кәсіпкер базар аумағынан өз еркімен кетіп, сауда контейнерлерін, шатырлары мен қоршауларын бөлшектеп әкетті. Жергілікті атқарушы орган кәсіпкерлік қызметтің үздіксіздігін қамтамасыз ету мақсатында саудагерлерге көршілес базарлардан жеңілдік шарттарымен баламалы жұмыс орындарын ұсынды.

Қазіргі уақытта босатылған аумақта жаңа қоғамдық кеңістік құру бойынша жобалау жұмыстары жүргізіліп жатыр. Мұнда келушілер үшін көгалдандырылған жайлы демалыс аймағы салынады. Сонымен қатар, көлік қолжетімділігін жақсарту және ретсіз тұрақ мәселесін шешу мақсатында аумақтың бір бөлігі ұйымдастырылған автотұрақ ашу үшін «Алматы паркинг» ЖШС-не беріледі.

Алматы қаласының әкімдігі заңсыз сауда нысандарын жою және жер телімдерін мақсатты пайдалануды қамтамасыз ету бағытындағы жүйелі жұмыстарды жалғастыра береді. Қала әкімі Дархан Сатыбалды атап өткендей, мегаполис аумағында заңдылық пен тәртіптің сақталуы — қала дамуының басты басымдығы болып табылады.