Алимент ала алмай отырған отбасыларға мемлекет көмектесуі керек – депутат

Құрылтай депутаты Лариса Ли Премьер-министрдің атына депутаттық сауал жолдап, алимент ала алмай отырған отбасыларға арнайы қолдау шараларын қарастыруды және борышкерлердің шынайы табысын бақылауды түбегейлі күшейтуді ұсынды.

Депутаттың айтуынша, қазіргі уақытта балаларын жалғыз бағып отырған аналар тамақ, киім, білім беру, емдеу, баспана жалдау және коммуналдық қызмет шығындарын толығымен өз мойнына алуға мәжбүр. Әсіресе үнемі реабилитацияны, медициналық және коррекциялық көмекті қажет ететін мүгедектігі бар балаларды тәрбиелеп отырған отбасыларға өте ауыр тиіп отыр.

Оның сөзінше, борышкерлер ресми түрде ең төменгі жалақыны көрсеткенімен, іс жүзінде әлдеқайда көп табыс табады.

«Табыс пен мүлікті жасырудың түрлі тәсілдері қолданылады. Соның салдарынан сот шешімі тек қағаз жүзінде қалып, оның балаға ешқандай экономикалық пайдасы болмай отыр», – деп атап өтті Лариса Ли.

Құрылтай депутаты мемлекет тарапынан алименттік міндеттемелердің орындалуын бақылау қаншалықты тиімді жүргізіліп жатқанын, соның ішінде цифрлық платформалар мен басқа да ақпарат көздері арқылы борышкерлердің нақты кірісін анықтау жүйесін бағалау қажет деп есептейді.

Бұдан бөлек, Лариса Ли мұндай отбасылар үшін мынадай бағыттар бойынша көмек шараларын әзірлеуді ұсынды:

• Баспана және тұрғын үйді жалға алу мәселелерін шешу;

• Коммуналдық шығыстарды азайту немесе субсидиялау;

• Мектепке дейінгі білім беру ұйымдарымен қамтамасыз ету;

• Кредит жүктемесін жеңілдету;

• Мүгедектігі бар балаларды өсіріп отырған отбасыларға қосымша қолдау көрсету.

«Біздің міндетіміз – қарызды қағаз жүзінде өндіріп алу емес. Негізгі мақсат – баланың сот тағайындаған қаржыны өз уақытында алып, өсіп-өнуін өтеу», – деп түйіндеді депутат.