Алғашқы автоматты айыппұл: Қазақстандық жүргізушілер үшін жаңа «сынақ» басталды

Қызылордада Қазақстан бойынша алғаш рет жүргізушінің көлік ішіндегі тәртібін автоматты түрде тіркейтін жүйе арқылы айыппұл жазылды. Бұл жөнінде Қызылорда облыстық Цифрлық технологиялар басқармасының басшысы Сәбит Ибадулла Digital Business-ке айтып берді.

Бұл жаңашылдық отандық нейрожелілермен жабдықталған SUNQAR кешенінің арқасында мүмкін болып отыр. Жасанды интеллект көлік ішіндегі жүргізушінің әрбір әрекетін өз бетінше сараптап, заң бұзушылықты анықтайды. Бұл жүйе 12 наурыздан бастап сынақтан өтіп, ведомствоаралық келісімдерден кейін ғана нақты айыппұлдар салуға көшті.

Айта кетерлігі, жасанды интеллект заң бұзушылықты тіркегенімен, соңғы шешімді полиция қызметкері қабылдайды. Тәртіп сақшысы Әкімшілік құқық бұзушылықтардың біріңғай тізіліміндегі электрондық нұсқамаға қол қойғаннан кейін ғана айыппұл ресми күшіне енеді.

Қазіргі уақытта жүйе кезең-кезеңімен енгізілуде. Әзірге автоматты режимде тек жүргізушінің қауіпсіздік белдігін тағуы бақыланады. Ал балаларды арнайы орындықсыз тасымалдау сияқты басқа да ереже бұзушылықтар бойынша камералар әзірге айыппұл салмайды.