$ 469.52 € 553.75 ₽ 6.15

Алғашқы атом стансасының атауы белгілі болды

Абдрахманов Мағжан
17 қараша 2025, 16:11
Алғашқы атом стансасының атауы белгілі болды Сурет авторы: gov.kz

Елдегі алғашқы атом электр станциясына атау беру бойынша жалпыұлттық конкурс өз мәресіне жетті. Нәтижесінде халық таңдауы «Балқаш» атом электр станциясы деген атауға тоқтады.

Конкурс Мемлекет басшысы Қасым-Жомарт Тоқаевтың 2025 жылғы 11 тамыздағы бастамасын жүзеге асыру мақсатында ұйымдастырылып, 2025 жылдың 25 қыркүйегі мен 10 қазаны аралығында eGov Mobile платформасында өтті.

Жалпы байқауға 16 жастан асқан 27 157 азамат қатысып, әрқайсысы бір ғана атау ұсынды. Барлық ұсыныстарды сараптау барысында 10 460 бірегей нұсқа тіркелген.

Құрамына қоғам өкілдері, креатив индустрия мамандары, сондай-ақ атом энергетикасы, филология және тарих саласының сарапшылары кірген комиссия ең танымал 100 нұсқаны қарады.

«Балқаш» атауын 882 қатысушы ұсынған. Халық арасында ең көп дауыс жинаған бұл нұсқа жеңімпаз деп танылып, елдің алғашқы атом электр станциясына ресми түрде беріледі», – делінген комиссия қорытындысында.

Таңдалған атау атом электр станцияларын географиялық нысан бойынша атау жөніндегі халықаралық тәжірибеге де сәйкес келеді.

Сонымен қатар нысанның атауы өзге тілдерде былай бекітілді:

  • орыс тілінде — «Атомная электростанция «Балхаш»»;

  • ағылшын тілінде — «Balkhash Nuclear Power Plant».

#Балқаш #АЭС атауы #Алғашқы АЭС

Соңғы жаңалықтар