Әлеуметтік тауарлар тізімі 31 өнімге көбейді

Сауда және интеграция министрі 2025 жылғы 23 желтоқсандағы бұйрығымен әлеуметтік маңызы бар азық-түлік тауарларының жаңа тізімін бекітті.

Жаңа тізімге 31 тауар позициясы енді:

• Бірінші сұрыпты бидай ұны
• Бірінші сұрыпты ұннан пісірілген бидай наны (қалыпты)
• Рожки (макарон)
• Қарақұмық жармасы
• Ақ күріш (дөңгелек)
• Картоп
• Асханалық сәбіз
• Пияз
• Ақ қауданды қырыққабат
• Қызанақ
• Қияр
• Алма
• Ақ қант – құмшекер
• Күнбағыс майы
• Сүйекті сиыр еті
• Сүйексіз сиыр еті
• Ет фаршы
• Қой еті
• Жылқы еті
• Балғын, салқындатылған және мұздатылған балық (табан, мөңке, көксерке, тұқы, сазан)
• Тауық еті (сан, сирақ)
• Тауық (тұтас ет)
• Майлылығы 2,2%-дан 6%-ға дейінгі пастерленген, ультрапастерленген және стерильденген сүт (дәмдеуіштерсіз және лактозасыз сүттен басқасы)
• Майлылығы 2-3% айран (лактозасыздан басқасы)
• Қаймақ (лактозасыздан басқасы)
• Майлылығы 5-9% ірімшік (творог)
• Майлылығы 40-50% қатты және жартылай қатты ірімшік (сыр)
• Сары май (тұздалмаған, майлылығы 72,5%-дан 80%-ға дейін)
• Тауық жұмыртқасы (I санат)
• Қара шәй (дәмдеуіштерсіз және пакеттелгеннен басқасы)
• Ас тұзы («Экстрадан» басқасы)

Баға қалай бақыланады?

Тізімдегі әрбір тауар үшін бөлшек сауда бағасының шекті мәні белгіленеді. Тауарды жеткізу шартында сауда үстемесінің шекті мөлшері міндетті түрде көрсетілуі тиіс. Бұл талапты бұзған мәмілелер жарамсыз деп танылады.

Бұйрық 2026 жылғы 4 қаңтардан бастап қолданысқа енгізіледі.

Бұл шара халық арасында ең көп сұранысқа ие өнімдердің қолжетімділігін арттыру және баға тұрақтылығын қамтамасыз ету мақсатында уақытша енгізіліп отыр.