Әлеуметтік маңызы бар азық-түлікке бағаны көтергендерге жаза қатаңдайды

Сауда және интеграция министрлігі әлеуметтік маңызы бар азық-түлік бағасын өсіргені үшін бизнес өкілдеріне әкімшілік жазаны қатаңдату жөнінде түзету әзірледі. Бұл туралы үкіметте 3 қыркүйекте ӘМАТ бағасын тұрақтандыру жөніндегі кеңесте сауда және интеграция бірінші вице-министрі Айжан Бижанова мәлімдеді.

"Қазіргі уақытта заңда әлеуметтік азық-түлік өнімдеріне 15%-дан аспайтын мөлшердегі сауда үстемесін асыра пайдалану бөлігінде бірінші рет бұзғаны үшін кәсіпкерге ескерту жасау белгіленген. Өзгерістер ескертуді 5-тен 150 АЕК-ке дейінгі айыппұлға ауыстыруды көздейді.  Өзгерістер жобасы бойынша реттеушілік әсерге талдау жүргізілді, жақында құжат Парламент Мәжілісіне жіберіледі", - деді Айжан Бижанова.

Жыл басынан бастап 29 тамызға дейін әлеуметтік өнімдерге сауда үстемесін асырғаны үшін 11,8 млн теңге сомасына 2807 әкімшілік қаулы шығарылды. Бұл 2023 жылдың сәйкес кезеңінен 4 есе көп (8 айда 760 қаулы. 2023).