Әлеуметтік маңызы бар азық-түлік бағасы 8 жылда алғаш рет төмендеді

2016 жылдан бастап елімізде алғаш рет әлеуметтік маңызы бар азық-түлік тауарларына (ӘМАТ) баға индексі төмендеді. Қабылдаған шаралардың нәтижесінде дефляцияның орташа индексі 99,8%-ды құрады.

Бағаның маусымдық ауытқуын болдырмау үшін нарыққа 160 мың тоннадан астам көкөніс өнімі жеткізілді. Сондай-ақ жұмыртқа өндірушілер одағымен жыл соңына дейін жұмыртқа бағасын белгілеу туралы келісімге қол қойылды, бұл нарықтағы баға демпингінің алдын алады. 

Бағаның негізсіз өсуін болдырмау мақсатында мемлекеттік бақылау күшейтілді. Осы жылдың басынан бастап 16,3 млн теңге сомасына сауда заңнамасын бұзу бойынша 2 357 әкімшілік іс қозғалды. Сауда үстемесін сақтау бойынша жұмыс қарқынды түрде жүргізілуде: 2024 жылдың бірінші жартыжылдығында сауда үстемесін асыра пайдалану туралы 1946 қаулы шығарылды. 

Жалпы ішкі тауар айналымы 27,6 трлн теңгеге (58,3 млрд доллар) жетті. Салаға құйылған инвестиция көлемі 282,4 млрд теңгеге (597,4 млн доллар) жетті. Жартысынан астамы көтерме және бөлшек сауданың үлесіне тиді.

Отандық тауар өндірушілерді қолдау үшін Сауда министрлігі қант экспортына уақытша тыйым салып, күнбағыс тұқымына экспорттық кедендік баж салығын енгізді.

Сөредегі азық-түліктің 50 пайызы, азық-түлік емес тауарлардың 20 пайызы отандық өнім болуы керек.

20 мыңнан астам кәсіпкер мен 5 мыңнан астам базар жұмысшысы мемлекеттік қолдауға ие болды.

Сауда базарларын жаңғырту белсенді жүргізілуде. 75 базарды жаңарту жоспарда, оның 16-сы биыл жаңартылады.