Әлемде жұмыссыз жүрген жастар көбейді

Халықаралық еңбек ұйымы ұсынған «Жастардың жұмыспен қамтылуының жаһандық үрдістері – 2026: Болашаққа оралу» баяндамасына сәйкес, әлемде 15 пен 24 жас аралығындағы еңбекке қабілетті азаматтардың арасында жұмыссыздық қарқыны артып келеді. Экономикалық өсімнің тоқырауы мен жаңа вакансиялардың тапшылығы жас мамандардың еңбек нарығына кірігуін қиындатқан.

Негізгі көрсеткіштер мен себептер:

• Жалпы статистика: 2025 жылдың қорытындысы бойынша жастар арасындағы жұмыссыздық көрсеткіші 12,4%-ға жетті. Бүгінгі таңда 67 миллионға жуық жас азамат ресми түрде жұмыссыз мәртебесіне ие.

• Өңірлік динамика: Бұл үрдіс әсіресе табысы жоғары мемлекеттерде белең алуда. 2023–2025 жылдар аралығында ғаламның 11 субөңірінің сегізінде теріс көрсеткіш тіркелген.

• Қатер факторлары: Геосаяси тұрақсыздық, цифрландыру және экономикалық бәсеңдеу жастарды жұмыспен қамтуға кері әсерін тигізіп отыр. Әсіресе кеңселік, әкімшілік, сауда, өңдеу өнеркәсібі мен қызмет көрсету саласындағы бастапқы жұмыс орындары қысқаруда.

• Бейресми сектор: Табысы төмен және орташа елдерде 15–29 жас аралығындағы еңбеккерлердің 90%-ға жуығы бейресми секторда нәпақа тауып жүр, бұл оларды әлеуметтік кепілдіктерден мақұрым етеді.

• Жасанды интеллект ықпалы: Технологиялардың дамуы салдарынан жастар иемденген жұмыс орындарының 6,1%-ы айтарлықтай өзгеріске ұшырау алдында тұр.

Сонымен қатар еңбек нарығында инженерия, медицина және ғылым салалары бойынша жоғары білікті мамандарға деген сұраныс жоғары деңгейде сақталып отыр.