$ 469.71 € 536.17 ₽ 6.01

Әлем чемпионаты: Англия мен Аргентина финал жолдамасын сарапқа салады

Абдрахманов Мағжан
15 шілде 2026, 11:19
Әлем чемпионаты: Англия мен Аргентина финал жолдамасын сарапқа салады Сурет авторы: Фабрицио Романоның коллажы

Бүгін АҚШ-тың Атланта қаласындағы «Mercedes-Benz Stadium» аренасында футболдан 2026 жылғы әлем чемпионатының екінші жартылай финалы өтеді. Финал жолдамасын Англия мен Аргентина құрамалары сарапқа салады.

Кездесу Қазақстан уақытымен 16 шілдеге қараған түні сағат 00:00-де басталады. Матчты елімізде «Qazsport» телеарнасы тікелей эфирде көрсетеді.

Англия құрамасы әлем чемпионатының жартылай финалына 2018 жылдан бері алғаш рет шығып отыр. Томас Тухель шәкірттері ширек финалда Норвегияны 2:1 есебімен жеңді. Бұл – ағылшындардың осы турнирдегі қатарынан төртінші жеңісі.

Ал әлемнің қазіргі чемпионы Аргентина соңғы төрт әлем чемпионатының үшеуінде жартылай финалға шықты. Лионель Скалонидің командасы 2014 және 2022 жылдардан кейін тағы да шешуші кезеңге жетіп отыр.

Кездесудің басты назарында екі команданың көшбасшылары болады. Аргентина сапында Лионель Месси әлем чемпионаттарының тарихындағы үздік сұрмерген атанып, осы турнирде сегіз голмен «Алтын бутсы» жүлдесіне басты үміткерлердің бірі саналады. Англия құрамасының шабуылшысы Харри Кейн алты гол соқса, Джуд Беллингем плей-оффтағы соңғы екі ойында төрт рет мергендік танытты. Оның қоржынында да – 6 гол.

Англия мен Аргентина арасындағы текетірестің тарихы бай. Екі құрама әлем чемпионаттарында бірнеше мәрте кездескен. Соның ішінде 1986 жылғы ширек финалда Диего Марадонаның әйгілі «Құдайдың қолы» голы футбол тарихындағы ең даулы сәттердің біріне айналған.

Жартылай финал жеңімпазы 19 шілдеде өтетін финалда Испания құрамасымен кездеседі.

#Аргентина-Англия #Англия #Футболдан әлем чемпионаты #Жартылай финал #Беллингем #Кейн

Соңғы жаңалықтар