Александр Бублик әлемнің үздік 10 теннисшісінің қатарына кірді

Қазақстандық теннисші Александр Бублик ATP рейтингінде оныншы сатыға көтерілді. Ол 3065 рейтингтік ұпай жинап, британдық Джек Дрейперді артта қалдырды.

Қазіргі рейтингте көш бастап тұрған – испаниялық Карлос Алькарас. Екінші орынға италиялық Янник Синнер жайғасса, үздік үштікті Германия өкілі Александр Зверев түйіндеп отыр.

Бұл нәтиже – Александр Бубликтың кәсіби мансабындағы айтулы белес. Ол алғаш рет әлемнің ең үздік он теннисшісінің қатарына енді. 11 қаңтар күні қазақстандық спортшы Гонконгта өткен ATP 250 санатындағы турнирде топ жарды. Финалда Бублик әлемнің жетінші ракеткасы Лоренцо Музеттиді 7:6 (7:2), 6:3 есебімен жеңді.

Осы жетістіктің арқасында Александр Бублик Қазақстан тарихында ерлер арасындағы жекелей сында ATP рейтингінің топ-10 қатарына енген алғашқы теннисші атанды.

Еске сала кетейік, ATP рейтингі соңғы 52 аптада өткен турнирлердің нәтижелері негізінде кәсіби ерлер теннисшілерін рейтингке бөлетін жүйе болып табылады.