Алаяқтардың жаңа айласы

Құқық қорғау органдары азаматтар алаяқтармен өздері байланысқа шығып, киберқатердің құрбанына айналатын жаңа алаяқтық тәсіл туралы ескертті. Бұл туралы ІІМ  хабарлады.

Полиция мен Бас прокуратура сақтық шараларын қатаң сақтауға және ұйымдармен тек ресми байланыс нөмірлері арқылы ғана хабарласуға кеңес береді.

Шетелдік дереккөздердің мәліметінше, алаяқтар жеткізу қызметтері, басқарушы компаниялар және банктер атынан электронды хаттар мен SMS-хабарламалар таратып, жаңа шабуыл толқынын бастаған. Мұндай хабарламаларда «мәселе туындады» деген жалған сылтаулар айтып, азаматтарды шұғыл әрекет жасауға итермелейді.

«Авторизациядағы қате», «домофонды ауыстыру», «есептегіштерді тексеру» деген желеумен алаяқтар адамдарды көрсетілген нөмірлерге өздері қайта қоңырау шалуға мәжбүрлейді. Салдарынан азаматтар алданғанын байқамай қалады да, алаяқтарға әлеуметтік инженерия әдістерін қолдануға және құпия деректерді алуға жағдай жасайды.

Құқық қорғау органдары мұндай жағдайларда алаяқтардың банк карталарының деректерін, SMS арқылы келетін бір реттік кодтарды және өзге де жеке ақпаратты иемденуге тырысатынын, бұл қаржылық шығындарға және аккаунттардың бұзылуына әкелуі мүмкін екенін атап өтті.

Полиция азаматтарды қырағы болуға, бейтаныс хабарламалар мен қоңырауларға сыни көзқараспен қарауға, ақпаратты ұйымдардың ресми сайттары арқылы тексеруге және қосымша қорғаныс шараларын, соның ішінде екі факторлы аутентификацияны қолдануға шақырады. Ведомстволардың атап өтуінше, киберқауіпсіздік ережелерін сақтау – алаяқтықтың жаңа тәсілдерінен қорғанудың ең тиімді жолы.