Алаяқтар рәсімдеген 717 млн теңге көлеміндегі несиелер кешірілді

Қазақстанда кибералаяқтардың әрекетінен зардап шеккен 100-ден астам азаматтың атынан алынған несиелер кешірілді. Бұл туралы Бас прокурор Берік Асылов Мәжіліс депутаттарының сауалына берген жауабында мәлімдеді.

Оның айтуынша, тек Қарағанды облысының өзінде 133 тұрғынның атына алынған жалпы сомасы 717,1 миллион теңге болатын несиелер есептен шығарылған.

Бұған дейін Мәжіліс депутаттарына 232 адамнан құралған бастамашыл топ жүгініп, кибералаяқтардың әрекетінен қарызға батқандарын айтып шағымданған.

«Өткен жылы интернет-алаяқтықпен күрес мақсатында “Киберпол” жобасы іске қосылғанымен, алданған азаматтар саны азайған жоқ. Алаяқтар ұрланған қаражатты шетелге шығарып үлгереді, ал қылмыстық істердің көбі тергелмей қалып отыр», – делінген депутаттардың сауалында.

Сондай-ақ олар банктік құпия мен несие рәсімдеу ережелерінің бұзылуы салдарынан тергеу мен құқықтық көмектің күрделенгенін атап өткен.

Берік Асыловтың айтуынша, заңнама мен банк жүйесі кибералаяқтық тәуекелдерін азайту бағытында жаңартылып жатыр.

«Қазіргі таңда зардап шеккендердің басым бөлігі тергеу органдарының ұсынуы бойынша өз атына рәсімделген несиелерден босатылды. Атап айтқанда, 133 азаматқа қатысты жалпы сомасы 717,1 миллион теңге болатын өндіріп алу тоқтатылды», – деді Бас прокурор.

Бас прокуратура өзге істер бойынша да дәл осындай ұсыныстарды уәкілетті органдарға жолдаған.