Алаяқ Instagram-да балалардың еміне деп 32 млн теңге жинап алған

ІІМ бірнеше интернет-алаяқтық фактілерін хабарлады.

Мәселен, Шымкентте алаяқ Instagram-да балалардың еміне деп 32 млн теңге жинаған. Алаяқ ұсталды, қазір қамауда.

Ал Қостанай тұрғыны DarkNet пен Telegram-да “кардингпен”, яғни банк карталарының деректемелерін ұрлап және оларды қайта сатумен, сондай-ақ ақшаға компьютерлік вирустарды таратуды үйретумен айналысқан. Ол осылай 1,5 млн теңгеден астам пайда тапқан. Ол ұсталып, сотталды.

Сәуір айында Украинаның Одесса және Запорожье қалаларында өткен халықаралық арнайы операция барысында бес алаяқтық call-орталық жойылды. Қаскүнемдер қазақстандық азаматтарға қатысты қылмыс жасаған. 30-дан астам күдікті ұсталды, қажетті іс-шаралар жүргізіліп жатыр.

Қыркүйек айында жедел іс-шараларды өткізу кезінде Алматы қаласында төрт call-орталық жойылып, 47 шетелдік ұсталды. Олар шет мемлекеттердің азаматтарына қатысты алаяқтықпен айналысқан. Тергеу шаралары жүргізіліп, тәркіленген техника тексеріліп жатыр.