«Алатау Сити» Орталық Азиядағы алғашқы толықтай кедергісіз қалаға айналуы мүмкін

ҚР Парламенті Мәжілісінің депутаты Ерлан Әбдиев Парламенттің бірлескен отырысында жаңадан салынатын «Алатау Сити» жобасына қатысты стратегиялық маңызды ұсыныс білдірді. Халық қалаулысы жаңа шаһарды халықаралық инклюзивті стандарттар бойынша салуды талап етті.

Депутаттың айтуынша, бүгінде Орталық Азия өңірінде ерекше қажеттіліктері бар жандар мен жүріс-тұрысы шектелген азаматтар үшін инфрақұрылымы 100% қолжетімді бірде-бір қала жоқ. Осы олқылықтың орнын толтыру үшін «Алатау Сити» жобасы алғашқы бірегей мекен болуы тиіс.

Инфрақұрылымға қойылатын негізгі талаптар:

Ерлан Әбдиев заңнаманың 49-бабына нақты техникалық түзетулер енгізуді ұсынды. Оның пайымдауынша, заманауи қала келесі талаптарға сай болуы керек:

• «Нөлдік деңгей» принципі: Барлық ғимараттардың кіреберіс топтары жер деңгейімен тең болуы тиіс. Бұл баспалдақтар мен қолайсыз пандустардан бас тартып, кедергісіз қозғалысты қамтамасыз етеді.

• Төмендетілген бордюрлар: Көше инфрақұрылымындағы жиектастардың (бордюр) биіктігі минималды деңгейге дейін түсіріліп, арбамен қозғалатын жандар мен балалар арбасы бар ата-аналарға барынша ыңғайлы болуы қажет.

• Міндетті лифт жүйесі: Егер ғимарат бір қабаттан жоғары болса, оның мақсатына қарамастан міндетті түрде лифтпен жабдықталуы шарт.

«Кез келген қала адамға және оның қолайлылығына бейімделуі тиіс. Өкінішке орай, Орталық Азияда толыққанды қолжетімділігі қамтамасыз етілген бірде-бір шаһар жоқ. «Алатау Сити» - осы мәселені түбегейлі шешуге берілген жаңа мүмкіндік», - деп атап өтті депутат.

Депутаттардың ұсынысымен қаланың әкімшілік актілері Экология кодексінің талаптарынан да жоғары қорғау деңгейін қамтамасыз етуі тиіс. Бұл «Алатау Ситиді» тек инклюзивті емес, сонымен қатар ең таза, «жасыл» қалаға айналдыруды көздейді.

Депутаттардың ұсынысы мен түзетулерінен соң қабылдаған конституциялық заң енді Мемлекет басшысының қарауына жолданды. Президент қол қойған сәттен бастап, Алатау қаласының ерекше мәртебесі заңды күшіне еніп, құрылыстың жаңа дәуірі басталмақ.