«Алаңдауға негіз жоқ»: Семейде 1 қазаннан бастап жылу беріле бастады

Семейде 1 қазаннан бастап жылу беріле бастады. Алдымен әлеуметтік нысандар жылу жүйесіне қосылса, қазір көпқабатты тұрғын үйлерге жылу беру жұмыстары жүріп жатыр. Бұл туралы Абай облысы әкімінің орынбасары Бекжан Бапышев мәлімдеді.

Оның айтуынша, облыс жылыту маусымына толық дайын, жылумен қамту қалыпты тәртіппен жүріп жатыр.

Бапышев Семейде екі жылға жоспарланған бес жоба бар екенін айтты. Соның бірінде мердігер қажетті құрылғыларды уақытында жеткізбеген. Қазір жабдық толық орнатылған.

«Біз жылыту маусымына толығымен кірдік. Бірінші кезекте әлеуметтік нысандар қосылды. Екінші кезекте тұрғын үйлер қосылып жатыр. Тұрғындардың алаңдауына еш негіз жоқ екенін жеткізгіміз келеді», – деді Бекжан Бапышев.

Оның айтуынша, өңірдегі жылумен қамту мәселесі тұрақты бақылауда.

Бұған дейін Үкімет отырысында Семейдегі жылу желілерінің уақытында дайын болмағаны айтылған еді. Премьер-министр Олжас Бектенов осыған байланысты Абай облысы әкімінің жауапты орынбасарын тәртіптік жауапкершілікке тартуды тапсырған.