Алакөлге билет алмас бұрын оқыңыз: Биылғы маусымның басты 5 жаңалығы

Биылғы жазғы маусымда Алакөл демалыс аймағында қауіпсіздікті қамтамасыз ету және сервисті жақсарту бойынша кешенді жұмыстар жүргізілмек. Бұл жайлы Туризм және спорт министрлігі жағалаудағы мәселелерді шешудің нақты жоспарын ұсынды.

Демалушылардың қауіпсіздігін нығайту мақсатында жағалау бойына 137 бейнебақылау камерасы орнатылады. Судағы қауіпсіздікті 100-ден астам құтқарушы мен әскери қызметкерлер қадағалап, арнайы катерлер мен қайықтар кезекшілікке шығады. Сонымен қатар, аймақта құны 1,4 млрд теңге болатын өрт сөндіру депосының құрылысы жүріп жатыр. Құқықтық тәртіпті сақтау үшін полиция бақылауы күшейтіліп, жол белгілерінің саны артпақ.

Туристер үшін көлік қолжетімділігін арттыру мақсатында Астана және Алматы қалаларынан субсидияланған рейстер сақталады. Сондай-ақ, Шымкент, Өскемен және Павлодар бағыттары бойынша қосымша әуе қатынастарын ашу мәселесі қарастырылуда. Теміржол қатынасына келсек, еліміздің әртүрлі өңірлерінен Алакөлге қарай 11 бағыт бойынша пойыздар қатынайтын болады.

Алакөлдің инженерлік желілерін жаңартуға қомақты қаражат жұмсалмақ:

• Жағалауды нығайту жұмыстарына — 15,2 млрд теңге;

• Электр желілерін жаңғыртуға — шамамен 8 млрд теңге бөлінген.

Бұған қоса, кәріз жүйелері мен тазарту құрылғыларын дамыту бойынша жобалар іске асырылуда.

Санитарлық бақылау және заңнама

Демалыс орындарындағы тазалықты сақтау мақсатында жүргізілген тексеріс нәтижесінде 81 заңбұзушылық анықталып, тиісті нұсқамалар берілді. Министрлік «маусымдық бизнес» ұғымын заңнамалық деңгейде бекітуді және кәсіпкерлердің жауапкершілігін арттыруды қолдап отыр.

Депутат Екатерина Смолякова атап өткендей, басты мақсат - есеп беру емес, азаматтардың демалысы үшін қауіпсіз әрі қолайлы орта қалыптастыру. Барлық атқарылып жатқан жұмыстар Парламент деңгейінде ерекше бақылауда болады.