Алакөлде «Алакөл алаулары – 2026» фестивалімен жаңа туристік маусым ашылды

Алакөл жағалауында биылғы жазғы демалыс маусымының ресми ашылуына орайластырылған «Алакөл алаулары – 2026» ауқымды мәдени шарасы өтті. Салтанатты жиынға облыс әкімі Берік Уәли арнайы қатысып, аймақ тұрғындары мен қонақтарын маусымның басталуымен құттықтады.

Өңір басшысы өз сөзінде Алакөлдің бірегей табиғи әлеуеті мен тарихи маңыздылығына тоқталып, бүгінде көлдің отандық және шетелдік саяхатшылар жиі келетін халықаралық деңгейдегі демалыс орнына айналғанын атап өтті. Саяхатшылардың жазбаларында ертеден мәлім бұл қасиетті мекеннің еліміздің басты інжу-маржаны екенін тілге тиек етті. Ерекше атап өтерлігі, биыл тұңғыш рет ұйымдастырылған бұл фестивальге Қазақстанның Халық әртісі Секен Тұрысбек бастаған еліміздің маңдайалды өнер майталмандары мен дарынды жас орындаушылары қатысты.

Аймақ басшысының мәлімдеуінше, мұндай мәдени және концерттік бағдарламалар тамыз айына дейін тұрақты түрде жалғасады. Демалушылар үшін аптасына екі рет (сәрсенбі және сенбі күндері) облыстың қалалары мен аудандарынан келген өнерпаздар, сондай-ақ «Абай елі – өнер кеніші» байқауының жеңімпаздары өнер көрсететін болады.

Фестивальдің ашылу салтанатында күйші-композитор Секен Тұрысбек, дәстүрлі әнші Дінисламбек Жайлаубай және отандық эстрада жұлдыздары Дана Кентай, Еркеш Хасен, Қанай, Зарина Омаровалар демалушыларға көтеріңкі көңіл-күй сыйлады. Мерекелік кеш ауқымды отшашумен түйінделді.

Биылғы туристік маусым алдында Мемлекет басшысының тапсырмасына сәйкес, жағалау аймағында инфрақұрылымды жаңарту және абаттандыру бойынша ауқымды жұмыстар атқарылды:

Демалушылардың жайлылығы үшін 50-ден астам санитарлық-гигиеналық торап, 35 душ кабинасы, 110 киім ауыстыру орны және 250 заманауи қоқыс контейнерлері орнатылды. Жағалау бойына ұзындығы 5 мың метрді құрайтын арнайы қалқаншалар қойылып, қауіпсіздікті қадағалайтын 224 бейнебақылау камерасы іске қосылды. Соңғы екі жыл ішінде көл маңындағы 10 шақырым көше жолдарына сапалы асфальт төселді. Биыл Үкіметтің қолдауымен ұзындығы 72 шақырымды құрайтын «Көктал-Алакөл» жоғары вольтты электр желісінің құрылысы басталды. Бұл стратегиялық жоба жағалаудағы электр қуатының тапшылығы мәселесін толықтай шешуге бағытталған.