Әл-Фарабидегі жол апаты: Алматы полициясының бірқатар басшысы қызметінен қуылды

Алматының Әл-Фараби даңғылында үш адамның өмірін қиған қайғылы жол апатынан кейін Ішкі істер министрлігі қатаң кадрлық шешімдер қабылдады. ІІМ Ақпараттық саясат департаментінің бастығы Шыңғыс Әлекешевтің мәлімдеуінше, қызметтік тексеріс нәтижесінде Алматы полициясының бірнеше жоғары лауазымды тұлғасы орнынан алынды.

Министрдің бұйрығымен келесі тұлғалар қызметінен босатылды:

• Сыртқы қызметтер мен жол қауіпсіздігіне жетекшілік ететін Алматы қалалық ПД бастығының орынбасары;

• Әкімшілік полиция басқармасының бастығы;

• Қоғамдық қауіпсіздік басқармасының басшысы.

Бұл тек кадрлық өзгерістермен шектелмейді. ІІМ мемлекеттік нөмірлерді заңсыз беру дерегі бойынша және ПД басшыларының біріне қатысты «әрекетсіздік» бабымен қылмыстық іс қозғады. Күдікті шенді уақытша ұстау изоляторына жабылды.

«Анықталған кемшіліктерге байланысты кадрлық шешімдер қабылданды. Сонымен қатар, мемлекеттік нөмірлерді заңсыз беру және полиция департаменті басшыларының біріне қатысты әрекетсіздік дерегі бойынша қылмыстық істер қозғалды», – деді Шыңғыс Әлекешев.

Еске сала кетейік, қасіретті оқиға 21 наурызға қараған түні болған еді. Zeekr электромобилінің жүргізушісі қарсы бағытқа шығып кетіп, Mercedes көлігімен соқтығысқан. Соққы салдарынан Mercedes жүргізушісі мен екі жолаушы бойжеткен оқиға орнында көз жұмды. Сараптама Zeekr жүргізушісінің жеңіл дәрежедегі мас күйінде болғанын растады. Қазіргі таңда күдікті жүргізуші сот санкциясымен қамауға алынды.

Анықтама ретінде айта кетсек, бұл оқиғадан кейін Алматы полициясы күшейтілген режимге көшіп, үш күн ішінде 5 мыңнан астам жол ережесін бұзу дерегін анықтаған.