Әл-Фараби даңғылындағы жол апаты: марқұмның туыстары 100 млн теңге талап етуі мүмкін

Алматыда Әл-Фараби даңғылында болған адам өліміне әкелген жол апаты бойынша қылмыстық іс сотқа жетті. Мамандандырылған ауданаралық қылмыстық сотта алдын ала тыңдау өтті.

Сот отырысынан кейін қаза тапқан Құмар Тенелбаеваның туыстарының адвокаты Мейірман Шекеев сенім білдірушісі әзірге айыпталушымен татуласуға дайын емес екенін айтты.

“Азаматтық талап аясында нақты қандай сома сұрайтынымыз әзір белгісіз, оны әлі келісеміз. Марқұм Changan көлігін несиеге алған. Қазір сол несиені ата-анасы төлеп жатыр. Бұдан бөлек те шығындар бар. Мүмкін 100 миллион теңге көлемінде талап қоямын. Себебі адам өмірінің құны жоқ. Бізде тіпті бақбақ жұлғаны үшін шамамен 13 миллион теңге айыппұл қарастырылған. Соған қарағанда адам өмірі әлдеқайда қымбат деп ойлаймын”, – деді адвокат.

Әл-Фараби даңғылындағы жол апаты 21 наурызға қараған түні болған. Апат салдарынан оқиға орнында үш адам қаза тапқан. Олар – 1996 жылы туған Еламан Қайыржанұлы, 2003 жылы туған Құмар Тенелбаева және 2005 жылы туған Томирис Қыдырбек.