Әл-Фараби даңғылындағы өліммен аяқталған жол апаты: жәбірленуші тараптар Александр Пақты кешірді

Алматыда Әл-Фараби даңғылында болған адам өліміне әкелген жол-көлік оқиғасы бойынша сот отырысында жәбірленуші тараптардың өкілдері Zeekr көлігінің жүргізушісі Александр Пақты кешіргендерін мәлімдеді.

Сот барысында қаза тапқан Құмар Теңелбаева анасы Бақытгүл Жолдасова мен Mercedes жүргізушісі Еламан Төлемісовтің әпкесі Ләззат Төлемісова айыпталушыға қатысты ешқандай наразылық жоқ екенін айтты.

Ләззат Төлемісованың сөзінше, отбасыға келтірілген материалдық және моральдық шығын толық өтелген. Ол туыстарының Александр Пақты толық кешіргенін және оған бас бостандығынан айырумен байланысты емес жаза немесе шартты жаза тағайындауды қолдайтынын жеткізді.

Бақытгүл Жолдасова да айыпталушымен толық татуласқанын айтты. 

– Ол шын жүректен өкініп, кешірім сұрады. Материалдық және моральдық шығынды толық өтеді. Менің де, туыстарымның да Александр Пакқа ешқандай наразылығымыз жоқ. Татуласу ешқандай қысымсыз, өз еркімізбен жүзеге асты. Оған бас бостандығынан айырмайтын жаза тағайындауды сұраймыз, – деді ол.

Ал қаза тапқан Томирис Қыдырбектің туыстарының ұстанымы әзірге тыңдалған жоқ. Олардың жауабы келесі сот отырысында қаралады. Келесі отырыс 4 маусым күні сағат 10:00-де өтеді.

Аталған іс бойынша негізгі сот талқылауы 1 маусымда басталды. Александр Пақ өз кінәсін толық мойындады.