Ақтөбеде тағы бір ауылдың тұрғындары эвакуацияланып жатыр

Ырғыз ауданында бұған дейін Нұра, Мамыр және Белшер ауылдарынан 900-ге жуық адам эвакуацияланған болатын.

Қазіргі кезде Мамыр мен Нұра ауылдарына су кірген. 

Енді төтенше жағдайлар қызметі, жергілікті атқарушы орган өкілдері мен еріктілер Құйлыс және Жайсаңбай ауылдарын судан қорғау үшін жағалауды бекітіп, құм толы қап төсеп жатыр. 

— Ауылда 541 адам тұрады. Олардың бір тобын тікұшақпен аудан орталығына жібердік. Әйелдер мен балалар ғана көшіріледі, ал ер адамдар қалады. Жылдам көшіру үшін тікұшақ қолданылып жатыр. Қазір біздің ауылдың жан-жағында су бар. Қайықпен, жол талғамайтын көлікпен өтуге болады. Бірақ тікұшақ тез эвакуациялауға мүмкіндік береді. Негізі бізге Ырғыз өзенінің суы келді. Қазір Торғай өзенінің суына дайындық жасап жатырмыз. Біз Ырғыз өзенінен су келетін соңғы нүктенің біріміз. Бізден кейін Жайсаңбай ауылы бар, — деді Тәуіп ауылдың округінің әкімі Камал Тілеужанов.