Ақтөбеде кепілге алынғандардың екеуі қаза тапты, полиция оқиғаның мән-жайын айтты

Ақтөбеде 13 қаңтар күні түнде жеке үйге белгісіз біреудің кіріп, адамдарды кепілге ұстап отырғаны туралы хабарлама келіп түскен. Полиция оқиға орнына жетіп, кепілге алушымен келіссөз жүргізбек болған. 

Полиция департаментінің мәліметінше, күдікті зардап шеккен әйелмен бұрын таныс болған. Ол ешқандай талап қоймаған. Үш сағатқа созылған келіссөздерден нәтиже шықпағандықтан, арнайы операция өткізу туралы шешім қабылданған.

"Арнайы операция барысында күдікті ұсталып, кепілге алынған әйел босатылды. Үйді тексеру кезінде жертөледен әйелдің қарт ата-анасы табылды. Олар пышақ жарақаттарын алған", – деп хабарлады Ақтөбе облысы ПД баспасөз қызметі.

67 жастағы ана жедел жәрдем көлігімен ауруханаға барар жолда қайтыс болды, ал 75 жастағы әкесі операция үстінде жан тапсырды. Олардың алған жарақаттары өмірге қауіпті болған.

Кепілге алынған әйел де жарақат алған. Оның басы мен қолында кесілген жаралар бар. Қазір оның жағдайы тұрақты ауыр. Дәрігерлер оған қажетті көмекті көрсетіп, психологтар психологиялық қолдау көрсетуде.

Қазіргі уақытта оқиғаға байланысты қылмыстық іс қозғалды. Күдікті уақытша ұстау изоляторына қамалды.