Ақтөбе облысында оқушылар уланғаннан кейін қауіпті снектер сатылымнан алынды

Ақтөбе облысындағы мектеп оқушылары жаппай уланғаннан кейін бірқатар импорттық снек өнімі сатылымнан алынды. Бұл туралы ҚР Денсаулық сақтау министрлігінің баспасөз қызметі хабарлады.

«Қазақстан Республикасы Денсаулық сақтау министрлігінің Санитариялық-эпидемиологиялық бақылау комитеті Ақтөбе облысындағы мектеп оқушыларының белгісіз өнімдерден (снектерден) жаппай улану фактісі бойынша дүкендерге мониторинг жүргізді. Осы өнімге қатысты жедел шаралар қабылданып, ол сатылымнан алынды. Аталған снектерді сататын сауда орындарына тек техникалық регламент талаптарына сай, сәйкестік декларациясы бар және тиісті таңбаланған азық-түлік өнімдерін сатуды қамтамасыз ету жөнінде ескерту жіберілді», – делінген хабарламада.

Мамандар 1 500-ден астам дүкенді тексеріп, 14 үлгіні зертханалық зерттеуге жіберді.

Тексеру нәтижесінде снек құрамында глутамат натрийі (E621), гуанилат натрийі (E627) және инозинат натрийі (E631) сынды дәм күшейткіштер анықталды. Алайда бұл қоспаларды қолдану техникалық регламент талаптарында белгіленбеген. Сонымен қатар өнімнің таңбалануында бірқатар заң бұзушылық анықталды:

• Құрамы, жарамдылық мерзімі, өндіруші туралы ақпарат көрсетілмеген;
• Генетикалық модификацияланған өнімнің (ГМО) бар-жоғы белгісіз;
• Өнімнің қауіпсіздігін растайтын сәйкестік декларациясы жоқ.

«Қазіргі уақытта аталған өнімдерді елге әкелуге және сатуға тыйым салынды», – деп мәлімдеді министрлік.