Ақтөбе облысында белгісіз дрон құлап, тексеріс басталды

2026 жылғы 29 сәуірде Ақтөбе облысында ұшқышсыз ұшу аппараты құлап, өрт шықты.

Алдын ала мәлімет бойынша, аппарат құлағаннан кейін шамамен 500 шаршы метр аумақта құрғақ шөп жанған. Оқиға орнына келген құтқарушылар өртті сөндірді.

Қазіргі уақытта Ақтөбе облысы полиция департаменті уәкілетті қызметтермен бірге Қарғалы ауданынан табылған ұшқышсыз аппараттың бөлшектерін тексеріп жатыр. Ведомствоның мәліметінше, нысан елді мекеннен тыс жерден анықталған.

Оқиғаның барлық мән-жайы анықталуда. Бұған дейін наурыз айында Батыс Қазақстан облысының Ақжайық ауданында ұшқышсыз аппаратқа ұқсас бөлшектер табылған. Сондай-ақ 2025 жылғы 18 ақпанда Бөкейорда ауданы Ұялы ауылында белгісіз ұшу нысаны анықталғаны хабарланған.