Ақтаудағы ұшақ апаты: қазірге дейін не белгілі?

2024 жылғы 25 желтоқсанда Ақтау әуежайы маңында Баку – Грозный бағыты бойынша ұшқан Azerbaijan Airlines әуе компаниясының Embraer 190 жолаушылар ұшағы апатқа ұшырады. Ұшақ бортында 67 адам, оның ішінде 5 экипаж мүшесі болған.

Оқиға хронологиясы:

• 11:20: Баку – Грозный бағытындағы ұшақтың Ақтауға шұғыл қонуға сұраныс жасағаны туралы алғашқы ақпарат пайда болды.

• 11:30: Ұшақ Ақтау әуежайы маңында апатқа ұшырады.

Биліктің реакциясы:

• Қазақстан Президенті Қасым-Жомарт Тоқаев Әзербайжан Президенті Ильхам Әлиевке көңіл айтты.

• Президент тапсырмасымен Премьер-Министрдің орынбасары Қанат Бозымбаев басқаратын мемлекеттік комиссия құрылды.

• Қазақстанның Төтенше жағдайлар министрі генерал-майор Шыңғыс Әрінов Ақтауға құтқару жұмыстарын үйлестіру үшін келді.

• Үкіметтік комиссия апат орнында жұмысын бастады. Вице-премьер Қанат Бозымбаев ауруханадағы зардап шеккендерді аралап, шетелдік әріптестерімен кездесіп, штаб отырысын өткізеді.

• Әзербайжаннан арнайы комиссия Ақтауға келіп, Маңғыстау облысының әкімі Нұрдәулет Қилыбаймен құтқару операциясы аясында қабылданған шараларды талқылады.

• Құтқару жұмыстарына 482 адам, 97 техника, 2 әуе кемесі және 4 кинологиялық есеп жұмылдырылды.

Зардап шеккендердің жағдайы:

• 29 адам ауруханаға жатқызылды; оларға қажетті медициналық, психологиялық және басқа да көмек көрсетіліп жатыр. Олардың арасында қазақстандықтар жоқ.

• Қырғызстан ТЖМ мәліметінше, апатқа ұшыраған ұшақ бортындағы үш қырғызстандық тірі.

• Ресей ТЖМ арнайы Ил-76 ұшағы апаттан зардап шеккен ресейліктерді Қазақстаннан Мәскеуге жеткізеді.

Қосымша ақпарат:

• Алдын ала мәліметтер бойынша, Грозныйдағы қалың тұманға байланысты ұшақ бағытын өзгертіп, Ақтауға қонуға мәжбүр болған.

• Апат алдында ұшақ құстар тобына соқтығысқан, бұл апатқа себеп болуы мүмкін деген ақпарат бар.

• Осы қайғылы оқиғаға байланысты 26 желтоқсан Әзербайжанда аза тұту күні болып жарияланды.

Құтқару жұмыстары жалғасып жатыр. Қасым-Жомарт Тоқаев зардап шеккендерге көмек көрсетуді және көрші елдердің үкіметтеріне қажетті қолдау көрсетуді ерекше бақылауда ұстауды тапсырды.