Ақтаудағы ұшақ апаты: қара жәшіктің жазбасы жарияланды

Baza Telegram арнасы Ақтауда апатқа ұшыраған AZAL әуе компаниясының Embraer 190 ұшағының қара жәшігіндегі пилоттардың диспетчерлермен жүргізген келіссөздерінің толық стенограммасын жариялады.

Жазбаға сәйкес, экипаж Грозный әуежайына қонбау, Махачкалаға ұшпау және соңында Ақтауға бет алу туралы шешімдерді өз бетінше қабылдаған. Сонымен қатар қара жәшіктегі деректер бойынша, экипаж мүшелері апаттың себебін кислород баллонының жарылуы немесе қозғалтқышқа құстың түсуі мүмкін деп болжаған.

Алайда бұл ақпарат ресми түрде расталған жоқ, ал стенограмманың шынайылығы да әзірге дәлелденбеген. Оның үстіне қара жәшік Бразилиядан Қазақстанға күні кеше ғана әкелінген. Көлік министрлігі барлық факті мен материал егжей-тегжейлі зерттелгеннен кейін алдын ала есеп дайындалатынын айтқан. Бұл есепте нақты ақпарат пен тергеу барысы туралы мәлімет беріледі.

Ресейдің Тергеу комитеті апатқа байланысты кешенді тексеру жұмыстарын жалғастырып жатқанын хабарлады. Әзербайжан және Қазақстан органдарымен тығыз ынтымақтастық орнатылған.

«Диспетчерлік қызметтердің, әуе қозғалысын ұйымдастыру жүйесінің және әуе қорғаныс қызметтерінің әрекеттерін бағалау үшін кешенді ұйымдастырушылық-техникалық сараптама жүргізіліп жатыр. Сондай-ақ Грозный, Махачкала және Минеральные воды диспетчерлерінің ұшақ командирімен жүргізген келіссөздері сарапталып жатыр», – деп мәлімдеді ведомство.

Тергеу барысында ұшақтың барлық жүйесі тексеріліп, апатқа себеп болуы мүмкін барлық ықтимал нұсқа қарастырылады.

25 желтоқсан күні Баку–Грозный бағытындағы Embraer 190 ұшағы Ақтау әуежайына жақын жерде құлап, борттағы 67 адамның 38-і қаза тапты. Қайтыс болғандардың ішінде алты қазақстандық болған.