Ақтауда катер жартасқа соғылып, екі адам қаза тапты

30 тамыз күні кешке Ақтау қаласының жағалауында серуендеу катері жартасқа соғылып, екі адам қаза тапты. Катерде жеті адам болған, деп хабарлады Маңғыстау облысының Төтенше жағдайлар департаменті.

Оқиға сағат 22:56 шамасында Ақтаудың 5а шағынауданындағы «Нұртөбе» іскерлік орталығы маңында болған.

Құтқару жұмыстары кезінде бес адам жағаға шығарылып, жедел жәрдем қызметкерлеріне тапсырылған. Қалған екі жолаушының үстінде құтқару кеудешесі болмаған. Олардың денесі жағадан шамамен 500 метр жерден табылып, судан шығарылған.

Дәрігерлердің мәліметінше, 38, 24 және 62 жастағы үш ер адам ауыр жағдайда жансақтау бөлімінде жатыр. 41 жастағы ер адам жарақат бөлімінде, жағдайы тұрақты. Ал 30 жастағы тағы бір зардап шегуші медициналық көмек алғаннан кейін амбулаториялық емге жіберілген.

Полиция Қылмыстық кодекстің 344-бабы – теміржол, әуе, теңіз немесе өзен көлігінің қозғалысы не оны пайдалану қауіпсіздігі қағидаларын бұзу бойынша қылмыстық іс қозғады. Қазір сотқа дейінгі тергеу жүріп, оқиғаның барлық мән-жайы анықталып жатыр.