Ақтау маңындағы ұшақ апаты: тергеуге кімдер қатысып жатыр?

Көлік министрлігі Ақтау маңындағы ұшақ апатын тергеуге кімдердің қатысып жатқанын хабарлады.

Апатты тергеу комиссиясы авиациялық оқиғалар туралы деректерді ұсыну және тергеу ережелеріне сәйкес құрылған. Оқиға орнында жүргізілетін далалық жұмыстарға Көлік министрлігінің оқиғалар мен инциденттерді тергеу департаментінің қызметкерлері қатысып жатыр.

Далалық зерттеулер Әзербайжанның авиациялық әкімшілігімен бірлесіп жүргізіліп жатыр. Қазақстанға Әзербайжанның азаматтық авиация мемлекеттік агенттігінің және Azerbaijan Airlines әуе компаниясының өкілдері келді. Сондай-ақ ұшақ өндірушісі Embraer компаниясы мен Бразилияның авиациялық оқиғаларды тергеу және алдын алу орталығы (CENIPA) мамандары да Қазақстанға ұшып шықты.

Ақтауда Премьер-Министрдің орынбасары Қанат Бозымбаевтың төрағалығымен үкіметтік комиссия жұмыс істеп жатыр. Оның құрамына Көлік министрі Марат Қарабаев, Көлік вице-министрі Талғат Ластаев, оқиғалар мен инциденттерді тергеу департаментінің директоры Нұржан Малаев, Азаматтық авиация комитетінің төрайымы Салтанат Томпиева және “Қазаэронавигация” бас директоры Нұржан Ахметов кірген.

25 желтоқсан күні таңертең Баку-Грозный бағыты бойынша ұшып бара жатқан, бортында 62 жолаушысы бар Azerbaijan Airlines әуе компаниясының ұшағы Маңғыстау облысы аумағында құлады. Апат салдарынан 38 адам қаза тапты.