$ 469.93 € 541.64 ₽ 5.71

Ақтастағы психиатриялық ауруханада науқастарға қатыгездік жасалды деген мәлімет тексерілді

Наурызбек Лесов
10 тамыз 2026, 12:35
Ақтастағы психиатриялық ауруханада науқастарға қатыгездік жасалды деген мәлімет тексерілді Сурет авторы: Денсаулық сақтау министрлігі

Алматы облысының Ақтас кентіндегі республикалық мамандандырылған психиатриялық ауруханада науқастарға қатыгездік жасалды деген ақпарат тексеріс барысында расталмады. Бұл туралы Денсаулық сақтау министрлігі хабарлады.

Тексеріске әлеуметтік желіде тараған жазба себеп болған. Онда ауруханада науқастарға күш қолданылғаны, дәрі-дәрмек ықпал ету құралы ретінде пайдаланылғаны және адамның қадір-қасиетін қорлайтын әрекеттер жасалғаны айтылған.

Министрлік мәліметінше, жазба авторы өзінің 2008 жылы аурухананың №7, №10 және №12 бөлімшелерінде болған кезіндегі оқиғаларды баяндаған. Оның жеке басына қатысты деректер жарияланбаған.

Қоғамдық талқылаудан кейін Медициналық және фармацевтикалық бақылау комитетінің Алматы облысы бойынша департаменті ауруханада тексеріс жүргізді. Мамандар медициналық көмектің көрсетілуін, психикалық денсаулық саласындағы медициналық-әлеуметтік қызметтің сапасын және науқастардың дәрі-дәрмекпен қамтылуын тексерген.

7 тамызда жасалған тексеру қорытындысына сәйкес, әлеуметтік желідегі жазбада келтірілген мәліметтер расталмаған.

Денсаулық сақтау министрлігі медициналық көмектің сапасы мен науқастардың құқықтарының сақталуын бақылауды жалғастыратынын мәлімдеді.

#Ақтас #Психиатриялық аурухана #Күш қолдану #Науқастар

Соңғы жаңалықтар