Ақсуда жастар мен облыс әкімі жаңа Конституция жобасы мен аймақ дамуын талқылады

Ақсу қаласында Павлодар облысының әкімі Асайын Байханов өңір жастары­мен жүздесті. Кездесу Еуразиялық энергетикалық корпорация алаңында ұйымдастырылып, адам капиталын дамыту, әлеуметтік бастамаларды жүзеге асыру және жаңа Конституция жобасына қатысты жастардың белсенділігі мәселелері қозғалды.

Eurasian Resources Group құрамындағы кәсіпорын Ақсу МАЭС станциясы мен «Шығыс» кенішін біріктіріп, елдегі көмір және электр энергиясын өндіру саласында жетекші орынға ие. Мұнда 4,5 мыңнан астам адам еңбек етеді, олардың басым бөлігі – жас мамандар. Әкім кездесу барысында осы буынға ерекше назар аударды.

Облыс басшысы жаңа Конституция жобасының басты ұстанымы – адам, оның өмірі мен құқықтары мемлекеттің ең жоғары құндылығы екендігін атап өтті. Оның айтуынша, бұл қағида жастардың ел болашағын қалыптастырудағы рөлін айқындай түседі. Мемлекет дамуға жағдай жасаса, жастар сол мүмкіндіктерді тиімді пайдаланып, білім мен кәсібилікті арттыруы қажет екенін жеткізді.

Кездесу барысында өңірде жалпы құны 7,3 триллион теңгені құрайтын 107 инвестициялық жоба жүзеге асырылып жатқаны айтылды. Бұл бастамалар 16 мыңнан астам жаңа жұмыс орнын ашуға мүмкіндік береді. Сонымен қатар әлеуметтік инфрақұрылымды жетілдіру, қалалық ортаны жақсарту бағытындағы жұмыстар жалғасуда.

Адам капиталын дамыту мәселесі де кеңінен талқыланды. Облыста 750 мыңға жуық тұрғын бар, оның едәуір бөлігін жастар құрайды. Қазіргі таңда 100-ден астам ірі кәсіпорын жас мамандарды жұмысқа қабылдауға дайын. Бұдан бөлек, 50-ден астам білім беру және тәжірибелік бағдарлама, 20-дан аса стартап-жоба, IT-хаб пен түрлі қоғамдық платформалар жұмыс істейді.

Кездесу кезінде жастар аймақтың даму келешегі мен алдағы референдумның маңызы жөнінде пікір алмасты. Ақсу МАЭС-тің жас қызметкерлері ел тағдырына бейжай қарамай, дауыс беруге қатысуға ниетті екендерін білдірді. Олар еңбек адамына көрсетіліп отырған қолдау мен әлеуметтік бағдарламалардың нәтижесін атап өтті.

Жиын соңында облыс әкімі тұрғындарды 15 наурызда өтетін референдумға белсенді қатысуға шақырып, өңірдің өркендеуі әр азаматтың жауапкершілігіне байланысты екенін айтты.