АҚШ визасын жылдам алуға мүмкіндік: Әлем чемпионатына баратындарға жеңілдік жасалуда

АҚШ президенті Дональд Трамп 2026 жылғы футболдан Әлем чемпионатына билет алған шетелдік жанкүйерлерге виза сұхбатына жазылуда басымдық берілетінін мәлімдеді. Бұл туралы ол дүйсенбі күні Ақ үйде мәлімдеді, деп хабарлады Qrnews BBC-ге сілтеме жасап.

Жаңа жүйе Fifa Prioritised Appointment Scheduling System (PASS) деп аталады. Ол ұзақ күту мерзіміне тап болған жанкүйерлерге FIFA арқылы елшілік немесе консулдықтағы сұхбат уақытын ертерек алуға мүмкіндік береді.

АҚШ мемлекеттік хатшысы Марко Рубионың айтуынша, билет иелеріне автоматты түрде виза берілмейді, бірақ олар өтініш бергеннен кейін 6–8 апта ішінде сұхбатқа шақырылуы мүмкін.

«Билет – виза емес. Ол елге кіруге кепілдік бермейді. Барлық өтініш иелері сияқты тексеру бірдей деңгейде жүргізіледі, айырмашылығы – олар кезекте алға жылжиды», – деді Рубио.

2026 жылғы Әлем чемпионаты АҚШ, Канада және Мексика елдерінде өтеді. Ойындардың басым бөлігі АҚШ-та ұйымдастырылмақ.

FIFA президенті Джанни Инфантиноның сөзінше, турнир кезінде АҚШ-қа 10 миллионға дейін шетелдік жанкүйер келуі мүмкін.

«FIFA Pass жүйесі арқылы билет сатып алған шынайы футбол жанкүйерлері виза рәсімдеуден бастап, турнирге дейін барынша қолайлы жағдайда бола алады», – деді ол.

Кейбір елдерде АҚШ визасын алу үшін күту мерзімі өте ұзақ. Мәселен, Колумбияда сұхбатқа жазылу уақыты – 11 ай, Мехикода – 9,5 ай, ал Торонто қаласында тұратын визасыз елдерден келген шетелдіктер үшін – 14 ай.

Туризм индустриясының өкілдері бұл шешімді оң бағалады.

Алайда жаңа ереже АҚШ-қа кіруге тыйым салынған елдердің азаматтарына қатысты қолданыла ма, әзірге белгісіз. Биыл маусымда Трамп қауіпсіздік себептеріне байланысты 12 елдің азаматтарына елге кіруге шектеу қойған.

Бұл тізімге Иран да кіреді, ал оның ұлттық құрамасы 2026 жылғы Әлем чемпионатына қатысуға жолдама алған. Президент жарлығына сәйкес, спортшылар мен жаттықтырушыларға жеңілдік қарастырылғанымен, жанкүйерлерге бұл тыйым сақталады.