АҚШ Украинаға жаңа бейбіт келісім жобасын ұсынды: Зеленский оны Трамппен талқылауды жоспарлап отыр

Украина президенті Владимир Зеленский АҚШ тарапынан ресми түрде ұсынылған бейбіт жоспар жобасын алғанын растады. Бұл туралы Украина президенті кеңсесінің ресми хабарламасында айтылды.

«Украина Ресей басқыншылығының алғашқы сәтінен бастап бейбітшілікті көздеп келеді және шынайы бейбіт өмірге жақындататын кез келген мазмұнды ұсынысты қолдайды. Украина биылдың басынан бері президент Трамптың бастамаларын қолдады және қазір де АҚШ пен Еуропадағы серіктестермен бірге нақты нәтижеге – бейбітшілікке жету үшін жұмыс істеуге дайын», — делінген мәлімдемеде.

Кеңсенің хабарлауынша, Зеленский алдағы күндері АҚШ президенті Дональд Трамппен дипломатиялық мүмкіндіктер мен бейбіт келісімнің негізгі тармақтарын талқылауды жоспарлап отыр.

Бұған дейін Financial Times және Axios басылымдары АҚШ-тың Ресеймен Украинадағы қақтығысты реттеуге арналған құпия консультациялар жүргізіп жатқанын жазған.

Басылым дерегінше, жаңа бейбіт жоспар Киевке берілген және құжат жобасында Украинадан:

– Донбасты Ресейге беру,

– қарулы күштер санын екі есе қысқарту,

– АҚШ-тың әскери көмегін азайту,

– орыс тіліне мемлекеттік мәртебе беру сияқты талаптар бар.