АҚШ Украинаға Қазақстан мұнайын таситын кемелерге соққы бермеуді ескертті

АҚШ билігі Украинадан Каспий құбыр консорциумы маңында Ресейге тиесілі емес танкерлерге шабуыл жасамауды талап етті. Бұл жөнінде The Wall Street Journal Chevron басшысы Майк Уирттің Дональд Трамп әкімшілігі өкілдерімен келіссөзінен кейін хабарлады. 

Басылым дерегінше, Вашингтон ҚҚК-ны Қазақстанда өндірілген мұнайды Еуропа нарығына жеткізетін аса маңызды бағыт әрі Ресейдің энергия қорларына балама жол ретінде қарастырады. АҚШ әкімшілігі Украинаға ресейлік емес кемелерге шабуыл жасауға болмайтынын ескерткен.

Бұған дейін Қара теңіздегі ҚҚК терминалы маңында бірнеше танкерге ұшқышсыз ұшу аппараттарымен шабуыл жасалған. Соның бірі Chevron жалдаған кеме болған. Шабуылдардан кейін терминал жұмысы бұзылып, Қазақстан мұнайын жөнелту қиындады. ҚҚК әлемдік мұнай жеткізілімінің шамамен 2%-ын тасымалдайды. 

Бұл жағдай Қазақстандағы мұнай өндіруге де әсер етті. Reuters дерегінше, ҚҚК мұнай қабылдауды тоқтатқаннан кейін Теңіз кен орнындағы өндіріс тәулігіне орташа 925 мың баррельден 406 мың баррельге дейін төмендеген. 

Chevron Теңіз кен орнындағы үлесінің 50%-ына иелік етеді. Компанияның есебінше, мұнай бағасы барреліне 70 доллар болған жағдайда Теңіз биыл шамамен 6 млрд доллар бос ақша ағынын әкелуі мүмкін. Сондықтан ҚҚК арқылы тасымалдың ұзақ уақыт үзілуі америкалық компания үшін де елеулі тәуекел саналады.