АҚШ Украинаға әскери көмек ретінде 300 миллион доллар жібереді

АҚШ-тың ұлттық қауіпсіздік жөніндегі кеңесшісі Джейк Салливан Конгресс Киевке көмектесу жөніндегі тұрақты жоспарларға бірнеше ай бойы тосқауыл қойып келе жатқандықтан, АҚШ Украинаға шағын жедел әскери көмек пакетін беретінін мәлімдеді, деп хабарлайды Qrnews.kz тілшісі DW-ге сілтеме жасап.

«Бүгін мен президент Байденнің атынан Украинаның ең өзекті қажеттіліктерін шешу үшін шұғыл әскери көмек пакетін және 300 миллион долларға қару-жарақ пен жабдық жөнелтілетінін хабарлаймын. Әлем қарап отыр. Сағат тілі жылжып жатыр, біз тезірек әрекет етуіміз керек»», – деді Салливан журналистерге.

Салливанның айтуынша, 300 миллион доллар (шамамен 275 миллион еуро) пакетіне артиллериялық оқ-дәрілер кіреді. Бұл – қазіргі уақытта Украина ең көп сұрап жатқан және соңғы екі жылда көп пайдаланылуына байланысты НАТО елдерінің қорларында азайып бара жатқан нәрсе.

Бұл мәлімдеме Польша премьер-министрі Дональд Туск пен президент Анджей Дуданың Ақ үйге сапары кезінде жарияланды. Онда олар НАТО-ның шығыс қапталын тұтастай нығайту туралы өтініш жасады.

«НАТО бүгін болмаса ертең НАТО-ның шығыс флангындағы операциялық мүмкіндіктері көбірек болуы керек екенін түсінуі керек», - деді Туск Вашингтонға келмес бұрын польшалық телеарнаға.

Байден сейсенбі күні поляк басшыларымен кездесуінде шұғыл көмек пакеті Украинаға жеткіліксіз екенін мәлімдеді.

Джо Байден әкімшілігі бірнеше ай бойы Конгресстен Украинаға 2024 жылға арналған әскери көмек көрсету жоспарын қабылдауды сұрап келеді. Бірақ жоспар Конгрестен толық қолдау таппай жатыр.

Жоспардағы пакет шамамен 60 миллиард долларды құрайды. Бұл сейсенбіде жарияланған шұғыл көмек пакетіндегі қаражаттан 200 есе көп. 

Байден, Украина президенті Зеленский және басқа да Батыс көшбасшылары, соның ішінде Германия канцлері Олаф Шольц Вашингтонға жақында келген сапарында төменгі палатадағы заң шығарушыларды бұл тығырықтан шығуға шақырды, бірақ әлі нәтижесіз.

Соңғы айларда украин әскері оқ-дәрілер мен техниканың жетіспеушілігінен біраз аумағынан, әсіресе Донецк қаласының солтүстігінде орналасқан Авдиевка қаласынан айырылып жатыр.

«Біз артиллериялық снарядтардың тапшылығына, әуе блокадасына, ресейлік алыс қашықтықтағы зымыран жүйелеріне және ресейлік ұшқышсыз ұшақтардың қарқынды шабуылдарына байланысты белгілі бір қиындықтарға тап болып отырмыз», - деді Владимир Зеленский дүйсенбі күні француз телеарнасына берген сұхбатында.

Алайда Владимир Зеленский «жағдайдың» тұрақталғанын және соңғы үш айдағыдан әлдеқайда жақсы екенін айтты.

Ол ресейлік әскердің алға жылжуы тоқтатылғанын, дегенмен де Мәскеу алдағы күн жылынатын айларда жаңа шабуылға дайындалып жатқанын ескертті.