АҚШ-тың жаңа сауда салығы Қазақстанға қалай әсер етеді: Министрлік жауап берді

АҚШ Қазақстаннан жеткізілетін кейбір тауарға 12,5% көлемінде қосымша кедендік баж енгізді. Алайда бұл шара қазақстандық экспорттың басым бөлігіне әсер етпейді, деп хабарлады Сауда және интеграция министрлігі.

Ведомство мәліметінше, жаңа баж АҚШ сауда өкілдігі бекіткен ерекшелік тізіміне кіретін тауарларға қолданылмайды. Министрліктің есебі бойынша, Қазақстанның АҚШ-қа экспортының шамамен 95%-ы бұрынғыдай қосымша баждан тыс қалады.

Сондай-ақ бұған дейін уақытша қолданылған 10%-дық импорттық үстеме 150 күндік мерзімі аяқталған соң күшін жойған. Сондықтан ол жаңа 12,5%-дық бажбен қосылмайды.

Бұған дейін АҚШ әкімшілігі 24 шілдеден бастап 60 сауда серіктесінің тауарларына 10% және 12,5% көлемінде жаңа баж енгізетінін хабарлаған. Қазақстанға қатысты мөлшерлеме 12,5% болып белгіленді.

АҚШ-тың жаңа тарифтік шаралары Федералдық тізілімде жарияланған хабарламада көрсетілген. Ол АҚШ импортының 99,4%-ын қамтиды, алайда мұнай мен газ, тыңайтқыштар және кейбір азық-түлік өнімдері сияқты бірқатар тауарға ерекшелік қарастырылған.

Қазақстанның Сауда және интеграция министрлігі отандық экспорттаушылардың мүддесін қорғау және екі тарапқа да қолайлы шешімдер табу үшін АҚШ-пен келіссөзді жалғастырып жатқанын мәлімдеді.